Их британи улс Оросын зүгээс ирэх кибер халдлагаас сэргийлэх зориулалттай 2000 орчим хүнтэй довтолгооны тусгай кибер салаа байгуулахаар төлөвлөөд байгааг хэмээн "Sky News" телевиз Британийн засгийн газар, Батлан хамгаалахын яамыг эх сурвалж болгон мэдээллээ.
Энэ шинэ салаа нь Вант улсыг кибер халдлагаас хамгаалах, кибер орон зайд болох дайнд оролцох боломжийг өргөжүүлэх ажиллагаа явуулна гэж үзэж байгаа юм байна.
"Sky News"-ийн эх сурвалжийн мэдээлснээр бол энэ төлөвлөгөөгөө хэрэгжүүлэхэд Лондон 250 сая фунт стерлинг зарцуулж кибер орон зайд довтлох чадвараа дөрөв дахин нэмэгдүүлэх аж.
Лондонгийн энэ төлөвлөгөө өнгөрсөн гуравдугаар сард Оросын Тагнуулын төв газрын ажилтан байсан хурандаа Сергей Скрипаль, түүний охин Юлия нарыг Солсберид хөнөөснөөс эхэлж Оросын эсрэг кибер халдлага хийхээр эхэлсэн гэж Британийн хэвлэл мэдээллийн хэрэгслүүд есдүгээр сард мэдээлж байсан юм. Засгийн газрын холбооны төвийн тэргүүн Жереми Флеминг бас Их Британи, түнш орнуудын хамт Оросын зүгээс ирэх аюулын эсрэг “тоног төхөөрөмжийн өргөн сайжруулалт” хийнэ гэж мэдэгдэж байсан юм.
Солсберид болсон явдлаас хойш Орос, Их Британийн харилцаа эрс муудаад байна. Британийн талын мэдээлж байгаагаар бол британийн талд үйлчилж тагнуул хийж байсныхаа төлөө Орост шүүгдэж байсан Скрипаль, түүний охин Юлия нар гуравдугаар сарын 4-нд хаалганы нь бариулд шингээсэн сэтгэцэд нөлөөлөх “Новичок” гэдэг хорт бодисын улмаас амь алдсан юм.
Энэ халдлагад Москва оролцсон байх магадлал өндөр хэмээн Лондон баталж байна. ОХУ үүнийг эрс няцааж ийм аргыг Зөвлөлт холбоот улсын үед ч, ОХУ байгуулагдсаны дараа ч хэрэглэж байгаагүй гэж мэдэгдэж байгаа юм.
Их Британийн ерөнхий сайд Терезэ Мэй мөрдөн шалгах ажлынхаа дүнгийн талаар есдүгээр сарын 5-нд парламентад танилцуулахдаа Скрипалийг хөнөөсөн хэрэгт оросын хоёр иргэнийг сэжиглэж байгаа гээд эднийг оросын Тагнуулын төв газрын туршуул гэж британийн тусгай алба үзэж байгаа гэжээ.