"Google"-ийг орхиж жижиг компанийг сонгох болсон шалтгаан юунд байв?
Дэлхийд тэргүүлэгч "Google" корпорацад програм хангамжийн инженерээр ажиллаж байсан Дарен Макак (Daren Makuck) гэгч энэхүү залуу гурван жилийн өмнө цалингаа 50 хувиар багасган "Qwil" хэмээх старт-ап компанид ажилд оржээ. Өндөр цалинтай ажлаа орхин шинэ бизнест хүч үзэх зоригтой шийдвэрийг гаргахад "Qwil"-ийн ерөнхий захирал Жонни Райнш(Johnny Reinsch)-ий ятгалга ихэд нөлөөлсөн байна.
Програм хангамжийн инженер Макак анх "Toro" хэмээх маркетингийн чиглэлийн старт-ап компани байгуулсныхаа дараа "Google"-ийн ажилтан болжээ. Жилийн дараа тэрээр дахин жижигхэн компанид ажиллахыг хүсч ажлаа орхин "Qwil"-ийг сонгожээ. Шинэ компанид "Google" дэх цалингийнхаа дөнгөж талыг авах байсан ч явах хүсэл эрмэлзэл байсаар байсан гэдгээ тэрээр дурссан байна. Гэвч тэрээр өөрийгөө чөлөөт ажилтнууд болон компаниуд хоорондын цалин мөнгөний асуудлыг зохицуулдаг цахим санхүүгийн "Qwil" компанид таарч тохирох ажилтан мөн үү гэдэгтээ эхэндээ их л эргэлзэж байжээ. Мөн тэрээр компанийн ерөнхий захирал Жонни Райншд өмнө нь өөрийн ажиллаж байсан видео тоглоом хөгжүүлэлтийн салбарт ажиллах сонирхолтой байгаагаа ч илэрхийлж байжээ.
"Ажилд орчихоод дөнгөж жилийн дараа л гармаар санагдаж эхлэвэл их л тоогүй хэрэг гэж би түүнд хэлж байлаа"
Дарен МакакГэвч үүнд Райншийн өгсөн хариулт түүний бодлыг тэр дор нь эргүүлжээ. "Хэрэв чамайг жил болоод гарах хэмжээний сэтгэл хангалуун бус байлгавал бид хариуцлага хүлээнэ гэж тэр хариулсан. Энэ үед би анх удаа өөрийгөө компанид ажилладаг хүн биш бүхэл бүтэн компани мэтээр төсөөлж үзсэн. Ажилтныхаа төлөө хариуцлага хүлээдэг компани л надад хэрэгтэй байсныг би мэдээгүй явлаа" гэж ярьжээ.
Энэ жилийн дөрөвдүгээр сарын байдлаар тус компанийн сангийн хөрөнгө 5 сая долларт хүрээд байна. Энэ нь Райнш бүх ажилтныхаа цалинг нэмэх боломжтой болсон гэсэн үг юм. Харин Макак цалинг нь нэмэхийг санал болгосонд эрс татгалзжээ. "Ажиллах хугацаандаа компанийн ерөнхий байдал, ажлын чиг хандлагыг ажиглахад амжилт маш ойрхон санагдсан. Тиймээс чадах бүхнээрээ компанидаа туслахыг хүссэн" хэмээн Макак тайлбарласан байна.
Гэвч Райнш түүнийг нэмэгдэл цалин авах ёстой гэдгийг ятгасаар байгаа аж. Ямартаа ч Макакийн хувьд гурван жилийн өмнө "Qwil"-д орох шийдвэр нь зөв байсан болж таарч байна.
"Сар бүр таны хэр их мөнгө олох нь нэг асуудал. Харин сар бүр таны сэтгэл ханамж хэр байх нь арай өөр асуудал. Энэхүү үнэ цэнийг ажилтнуудтайгаа хуваалцана гэдэг үнэхээр гайхалтай мэдрэмж"
Жонни Райнш - "Qwil" компаний ерөнхий захирал