Үндэсний их баяр наадамд шөвгөрсөн 16 бөхөөс Допингийн эсрэг үндэсний төв жил бүр сэргээшийн шинжилгээ авдаг журамтай. Энэ дагуу Ардын хувьсгалын 98 жилийн ойн Үндэсний их баяр наадмын хүчит бөхийн барилдааны шөвгийн 16 бөхөөс допингийн шинжилгээ авсан билээ. Допингийн эсрэг үндэсний төвөөс бөхчүүдийн шинжилгээний хариуг өнгөрсөн долоо хоногт Баяр наадмын зохион байгуулах хороонд хүргүүлсэн бөгөөд хоёр бөхөөс хориотой бодис илэрсэн гэх мэдээлэл бий. Баяр наадам зохион байгуулах хорооноос бөхчүүд рүү утсаар холбогдож допингийн шинжилгээний хариуг өгч буй ч албан ёсны мэдээллийг олон нийтэд зарлахыг бөхчүүд шаардаж эхлээд байна. Тухайлбал, Улсын аварга Н.Батсуурь, Улсын арслан П.Бүрэнтөгс, Ц.Содномдорж, Улсын харцага Б.Анар нарын бөхчүүд цахим хуудсаар дамжуулан шинжилгээний хариуг ил болгохыг Баяр наадмын зохион байгуулах хорооноос шаардаад буй.
Мөн шинжилгээний хариуг утсаар мэдэгдсэн талаар шөвгөрсөн бөхчүүдийн олонх нь цахим хуудсаар дамжуулан мэдэгдээд байгаа. Тодруулбал, Улсын аварга С.Мөнхбат, Ч.Санжаадамба, Н.Батсуурь, Улсын арслан Ц.Содномдорж, Улсын өсөх идэр начин Э.Энхбат нарын 13 бөхөөс сэргээш илрээгүй гэдгийг өөрсдөө мэдэгдээд байна.
Тухайлбал, Улсын аварга С.Мөнхбат “Сайхан намаржиж байна уу. Ардын хувьсгалын 98 жилийн ойн баяр наадамд шөвгөрсөн бөхчүүдийн допингийн шинжилгээний хариу ирсэн байна. Миний биед ямар нэгэн допингийн бодис илрээгүй нь тогтоогдсон” гэжээ. Улсын өсөх идэр начин Э.Энхбат “Наадмаас хойш хөдөөгүүр явж байгаад өнөөдөр утсаа асаасан чинь наадмын комиссоос над руу залгаж, допингийн шинжилгээний хариуг мэдэгдлээ. Надаас хориотой бодис илрээгүй байна” гэв.
Харин өнөөдрийн байдлаар Улсын аварга Э.Оюунболд, Улсын начин Д.Цэрэнтогтох, Улсын начин Ж.Ням-Эрдэнэ нар хариу авсан эсэхээ мэдэгдээгүй байна. Монгол Улсад авто замын салбар үүсэж хөгжсөний түүхт 90 жилийн ойн баяр наадам өнгөрсөн амралтын өдрүүдэд Хүй долоон худгийн Монгол наадам цогцолборт болсон бөгөөд тус наадмын бөхийн барилдаанд хоёр даваад байсан Улсын аварга Э.Оюунболд өчигдөр очиж барилдаанаа үргэлжлүүлэх боломжгүй болсон тухайгаа мэдэгджээ. Аварга Э.Оюунболд ямар учраас чөлөө авсан нь тодорхойгүй байна. Тэрбээр "Намайг сэргээш хэрэглэсэн мэт харагдуулах гэсэн зохион байгуулалттай үйл ажиллагаа явуулж байна" гэдэг тайлбар хийгээд байна.
Дээрх асуудлаар Монголын Үндэсний бөхийн холбооны гүйцэтгэх захирал, улсын заан Б.Сайнбаяраас тодруулахад “Допингийн шинжилгээний хариуг манайд ямар нэгэн байдлаар танилцуулаагүй байна” гэдэг мэдээллийг өгсөн. Удахгүй бөхчүүдээс авсан сэргээшийн шинжилгээний хариуг Баяр наадмын зохион байгуулах хороо ил болгох биз ээ.
ҮНДЭСНИЙ ИХ БАЯР НААДМЫН ХҮЧИТ БӨХИЙН БАРИЛДААНД
ШӨВГӨРСӨН 16 БӨХИЙН НЭРС
Улсын аварга Ч.Санжаадамба
Улсын аварга Н.Батсуурь
Улсын аварга С.Мөнхбат
Улсын аварга Э.Оюунболд
Улсын арслан П.Бүрэнтөгс
Улсын арслан Ц.Содномдорж
Улсын гарьд Б.Гончигдамба
Улсын харцага Б.Бат-Өлзий
Улсын өсөх идэр начин Э.Энхбат
Улсын начин Д.Анар /Улсын харцага цол хүртсэн/
Улсын начин Д.Цэрэнтогтох
Аймгийн хурц арслан Б.Орхонбаяр /Улсын начин цол хүртсэн/
Аймгийн арслан Н.Баярбаатар /Улсын начин цол хүртсэн/
Аймгийн арслан Ж.Ням-Эрдэнэ /Улсын начин цол хүртсэн/
Аймгийн арслан Б.Цэдэнсодном /Улсын начин цол хүртсэн/
Аймгийн арслан А.Давааням /Улсын начин цол хүртсэн/
Эх сурвалж. www.zindaa.mn