Трампын засаг захиргаа 32 ширхэг F-35 сөнөөгч онгоцыг Польшид 6.5 тэрбум доллароор зарах болсныг CNN агентлаг мэдээллээ. Засаг захиргаанаас Конгресст энэ тухайгаа мягмар гарагт албан ёсоор мэдэгдсэн байна.

Дэвшилтэт технологи бүхий энэхүү онгоц нь Польшийн Агаарын цэргийн хүчин НАТО болон бусад эвслийн үйл ажиллагаанд хувь нэмэр оруулах, Польшийн өөрийгөө хамгаалах чадварыг сайжруулах, цэргийн чадавхийг шинэчлэхийн зэрэгцээ АНУ, НАТО-ийн гишүүд болон бусад холбоотнуудад нөлөө үзүүлнэ гэдгийг Батлан хамгаалах яамны мэдэгдэлд дурджээ.

Зургадугаар сард Польшийн Ерөнхийлөгч Анджей Дуда Цагаан ордонд айлчлах үеэр АНУ-ын тэнгисийн цэргийн корпусын F-35 сөнөөгч онгоцнууд үзүүлэх нислэг үйлдэж байв.

Түүнчлэн Польш батлан хамгаалахынхаа зардлыг тасралтгүй нэмэгдүүлж байгаа нь зарим талаараа Москвагаас Украинд цэргийн түрэмгийлэл үзүүлсний дараах Варшавын түгшүүртэй холбоотой аж.

F-35 маркийн сөнөөгч онгоцыг түүхэн дэх хамгийн үнэтэй зэвсэг гэж нэрлэдэг байсан бөгөөд хөгжүүлэлтийг нь олон удаа хойшлуулсны эцэст байлдаанд бэлэн хэмээн хүлээн зөвшөөрч байв.

Польш бол НАТО-гийн санал болгосон ДНБ-ийн 2% -ийг батлан хамгаалахад зарцуулах бодлогыг дагадаг цөөхөн хэдэн НАТО-гийн гишүүдийн нэг юм. 

6.5 тэрбум долларын сөнөөгч онгоц худалдан авах нь Польшийн батлан хамгаалахын зардлын дийлэнх хувийг эзэлж байгаа тул НАТО 2019 оны батлан хамгаалах ажилд 11.9 тэрбум долларыг нэмж зарцуулахаар төлөвлөжээ.

Мөн Европын холбооны Норвеги, Итали, Нидерланд, Их Британи зэрэг орнууд F-35 онгоцыг эзэмшдэг ба Бельги, Дани улс ч үүнийг худалдаж авч байгаа аж.