Амазоны уугуул иргэдийн эрхийг хамгаалдаг Бразилын төрийн албан хаагч буудуулж амиа алджээ
Амазоны уугуул иргэдийг мод бэлтгэгч, уурхайчид болон бусад аюулаас хамгаалахын тулд арав гаруй жил ажилласан Бразилын засгийн газрын албан хаагч амь үрэгджээ. Тодруулбал Максиэль Перейра дос Сантос нь гэр бүлийнхнийхээ нүдэн дээр үл таних этгээдүүдэд хоёр удаа буудуулж амиа алдсан болохыг "Telegraph" сонин мэдээлсэн байна.
Ноён Сантос нь уугуул иргэдийн эрх ашгийг хамгаалдаг Бразилын засгийн газрын байгууллага болох Үндэсний Индианчуудын сан "Фунай"-д 12 гаруй жил ажилласан нэгэн юм. Түүнийг Колумб, Перу улсын хилийн ойролцоо Амазоны ширэнгэн ойд байрладаг Табатина хотын төв гудамжинд мотоциклтой явж байхад нь буудсан аж.
"Фунай"-н ажилтнуудыг төлөөлдөг "INA" эвлэлээс ноён Сантосыг уугуул омгийнхны хамгийн ихээр амьдардаг Вале до Жаваригийн байгалийн нөөц газрыг хамгаалах тал дээр олон ажил гүйцэтгэснийхээ төлөө захиалгаар алагдсан гэж үзжээ.
Тус хэргийг цагдаа нар шалгаж байгаа боловч гэмт хэргийн сэдлийг нь тогтоогоогүй байгаа гэж Бразилын "Folha de S.Paulo" сонинд бичжээ.
Бразилын ерөнхийлөгч Жаир Болсонаро Амазоныг хамгаалахын тулд хангалттай ажил хийж чадаагүйн улмаас олон улсын шүүмжлэлтэй тулгараад байгаа. "Ройтерс" -ийн дүн шинжилгээгээр Болсонаро энэ оны 1-р сарын 1-нд албан тушаалаа авснаас хойш тус улсын ой модыг хамгаалах төрийн байгууллагын төсөв 25 хувиар буурсан байна.