Аравдугаар сарын 16-ныг “Дэлхийн хүнсний өдөр” болгон тэмдэглэдэг. Тэгвэл Хүнс хөдөө аж ахуйн байгууллагаас өнөө жил тус өдрийг “Бидний үйлдэл Бидний ирээдүй: Эрүүл хүнс- Зөв хооллолт. Өлсгөлөнгүй дэлхий” гэсэн уриан дор тэмдэглэж байгаа юм.
Уг арга хэмжээг Нэгдсэн үндэсний байгууллагын Хүнс, хөдөө аж ахуйн байгууллага, Монгол Улсын Засгийн газар, Хүнс, хөдөө аж ахуй, хөнгөн үйлдвэрийн яам болон хүнс, хөдөө аж ахуйн салбарт ажилладаг байгууллагуудтай хамтран өнөөдөр 10:00-17:00 цагийн хооронд Сүхбаатарын талбай дээр зохион байгуулж байгаа юм. 40 аж ахуйн нэгж, байгууллага, хүнс үйлдвэрлэгчид өөрсдийн үйлдвэрлэж буй эрүүл мэндэд ашигтай бүтээгдэхүүний талаар танилцуулах үзэсгэлэн худалдаа болох бөгөөд мэргэжлийн байгууллагууд эрүүл хүнс-зөв хооллолтын талаар зөвлөгөө өгч байгаа юм байна.
УИХ-ын гишүүн, Байгаль орчин, Хүнс Хөдөө Аж Ахуйн байнгын хорооны дарга Х.Болорчулуун: “Хөдөө аж ахуйн салбар нь манай улсын эдийн засгийн хоёр дахь гол салбар боловч салбарын өнөөгийн хөгжил нь хангалтгүй байна. Шинжлэх ухааны суурь судалгаа, дэвшилтэт техник, технологийн нэтврүүлэлт, боловсон хүчний чадавхийг дээшлүүлэх зэрэг хийх ажил бидэнд их байна. Үүнд тал бүрийн оролцоо чухал. Ялангуяа хариуцлагатай засаглалын хүрээнд, төр, шинжлэх ухаан, хувийн хэвшлийн хамтын ажиллагаа болон Нэгдсэн Үндэстний Байгууллагын Хүнс хөдөө аж ахуйн байгууллага зэрэг олон улсын байгууллагуудтай хамтын ажиллагааг бэхжүүлж, хүлээсэн үүргээ хариуцлагатайгаар биелүүлж, цаашдын үйл ажиллагаагаа өргөжүүлэх нь чухал байна” гэв.