18-р зууны сүүлчээр Британийн ард иргэд боолчлолыг эсэргүүцэх хөдөлгөөн санаачилсан бөгөөд уг санаачлага нь үр дүнгээ өгч 300,000 орчим иргэд боолуудыг хөдөлмөрлүүлж бүтээдэг элсэн чихэр зэрэг бүтээгдэхүүнүүдийг хэрэглэхээс татгалзсанаар боолын наймаа болон бизнес эрхлэгчдэд дарамт болж эхэлсэн юм.
Харин одоо үед уг аргыг улс төр болон бусад асуудлуудад өргөнөөр ашиглах болсон билээ. Хамгийн сүүлд өрнөсөн тэмцэл нь Фэйсбүүкийн эсрэг гарч байгаа бөгөөд шалтгаан нь арьс өнгөний үзэл сурталтай контентуудыг сангаасаа хангалттай сайн устгахгүй байна гэх үндэслэл юм.
Уг үзлээс болж нэлээд олон томоохон корпорацууд болон цахим үйлчилгээ эрхэлдэг нэлээд олон газрууд Фэйсбүүкд сурталчилгаа байршуулахаа болиод байгаа юм.
Хамгийн сүүлд Ford, Adidas,HP, Coca-Cola, Unilever болон Starbucks зэрэг маш томоохон компаниуд уг асуудалд нэгдсэн билээ. Аксиос гэх мэдээний албаны мэдээлснээр тун удахгүй Microsoft компани ч бас Фэйсбүүк болон Instagram-д сурталчилгаа байршуулахаа болихоор төлөвлөж байгаа аж.
Энэ төрлийн бойкот Фэйсбүүкд нөлөөлөх үү? Товчоор хариулахад бол тийм. Фэйсбүүкийн орлогын ихэнх хувь нь сурталчилгааны төлбөрөөс бүрддэг. Авива хөрөнгө оруулалтын байгууллагын мэргэжилтэн Дэвид Куммин: Ийм хэмжээний байдал энэ бизнесийг дампууруулах боломжтой гэж BBC агентлагт өгсөн мэдэгдэлдээ дурьджээ.
Өнгөрсөн баасан гаригийн өглөө Фэйсбүүк компанийн хувьцааны үнэ 8%-р буурсан бөгөөд үнийн дүнгийн хувьд уг компанийн эзэн Марк Зукербергийг 6 тэрбум фунт.стерлингийн алдагдалд оруулаад байгаа юм. Гэсэн хэдий ч уг асуудал нь цаашид хэрхэн нөлөөлөх тал дээр одоо болтол тодорхойгүй байгаа юм.
Уг асуудал нь цахим сүлжээний бизнес эрхэлдэг газрыг бойкотлож байгаа анхны тохиолдол биш юм. 2017 онд нэлээд олон томоохон брэндүүд зар сурталчилгааг нь арьс өнгөний болон бэлгийн чиг хандлагаар ялгаварлан гадуурхсан утгатай бичлэг дээр байрлуулсан гэдэг үндэслэлээр Youtube-д сурталчилгаагаа тавихаас татгалзаж байсан юм. Өнөөдөр уг асуудал бараг мартагдсан бөгөөд Youtube зар тавих дүрэм, журмаа тэр даруй өөрчилж байсан юм.
Одоогийн байдлаар Фэйсбүүкийг бойкотлох хөдөлгөөнд нэгдсэн ихэнх компаниуд 7-р сарын турш буюу нэг сарын турш уг арга хэмжээг үргэлжлүүлнэ гэж мэдэгдээд байгаа юм.
CNN агентлагийн мэдээлснээр Фэйсбүүк-н сурталчилгаанд хамгийн өндөр төлбөр төлдөг 100 брэндийн нийт төлбөр өнгөрсөн жилийн байдлаар 4.2 тэрбум ам.доллар болж байжээ. Хэрэв уг үзэл 8-р сараас хойш үргэлжилж бусад олон компаниуд нэгдвэл бид цаашид Фэйсбүүк хэрэглэх эсэх нь эргэлзээтэй болж эхлэх юм.
Эх сурвалж: BBC
