Robotaxi Voyage стартап компани автомат жолоодлоготой, коронавирус устгах төхөөрөмж бүхий машин үйлдвэрлэхээр ажиллаж байна. Уг төсөл нь ихэвчлэн ахмад настнуудад болон түргэн тусламжид үйлчлэхээр бүтээгдэж байгаа бөгөөд гэр бүлийн зориулалт бүхий дотроо зай талбай ихтэй машин сонгож байгаа бөгөөд нэмэлтээр коронавирус устгах зориулалт бүхий хэт ягаан туяаны системийг суурилуулж байгаа ажээ.
Хэт ягаан туяаны системийг “GHSP” гэх авто машины эд анги үйлдвэрлэгч компани бүтээж байгаа бөгөөд тэд “Voyage”-ын хамгийн сүүлд загварчилж, бэлдээд байгаа “Chrysler Pacifica Hybrid” гэх машинд зориулан туршилт хийж байгаа ажээ. Харин машины жолоодлого болон бусад програм хангамжийн чиглэлээр “Fiat Chrysler, Nvidia болон Blackberry” компаниуд хамтран ажиллаж байгаа ажээ.
Тэдний гол зорилго нь өмнө дурдсанчлан ахмад настнууд болон түргэн тусламжийн чиглэлийн үйлчилгээ үзүүлэх юм. Эдгээр иргэд нь коронавирусын эрсдэл өндөртэй бүлэг бөгөөд халдвар авсан хэрэглэгчээс, дараагийн хүнд халдвар тархаахгүйн тулд вирусийг устгах төрлийн технологийг ашиглах болсон гэнэ. Хэт ягаан туяаны төхөөрөмжийг бүтээж буй “GHSP” компани нь мөн түргэн тусламжийн машинуудад ариутгал, халдваргүйжүүлэлт хийдэг хэт ягаан туяаны төхөөрөмжүүдийг үйлдвэрлэж өгдөг байна.
Туршилтын шатанд хэт ягаан туяаг ашиглаж үзэхэд маш сайн үр дүнтэй байсан бөгөөд ил гадаргуу дээр тогтсон коронавирусыг устгаад тогтохгүй ханиад зэрэг бусад олон өвчний вирусийг устгаж байсан гэнэ.
Бусад бүх л салбарын адилаар автомат жолоодлоготой машин үйлдвэрлэгчид ч цар тахлын үетэй зохицож хөгжихөөр хичээж байна. Одоогийн байдлаар Robotaxi Waymo зэрэг компаниуд бүтээгдэхүүнээ олон нийтийн хэрэглээнд гаргаж эхлээгүй байгаа юм. Учир нь тэд тээврийн хэрэгслүүдээ цар тахлын үед зориулан сайжруулах хэрэгтэй гэж үзэж байгаа юм. “Voyage” компани цаашид ижил технологиор хүнд даацын болон ачаа тээврийн машинуудыг бүтээх талаар бодож байгаа гэнэ. Учир нь тээвэр зуучдын ажил нь халдвар тархаж болох нэгэн төрлийн зам учраас энэ төрлийн аюулыг ч арилгах хэрэгтэй гэж үзэж байгаа юм?
“Voyage” компани түргэн тусламжаас гадна ахмад настнуудад үйлчилгээ үзүүлэхийг сонгосон нь ч учиртай гэнэ. Өндөр настай иргэд нь өөрсдөө жолоо барих боломжгүй, эсвэл биеийн байдлын улмаас хөдөлгөөнд оролцох чадваргүй болсон байх нь элбэг. Тийм ч учраас тогтмол, дундаж хурдаар явдаг, гэрээс гэрт хүргэж үйлчлэх ийм төрлийн үйлчилгээ маш чухал гэж үзсэн байна. Мөн түүнчлэн ийм төрлийн зах зээл эрэлт ихтэй байж болзошгүй бөгөөд бусад автомат жолоодлоготой машин бүтээгчид зөвхөн ахмадуудад зориулсан бүтээл гаргаагүй байгаа нь давуу тал болох юм.
Хэт ягаан туяа нь хүний биед хортой байдаг, тийм ч учраас аюулгүй байдлыг бодолцон “Voyage” компани суудал болон хаалга гэх мэт хэд хэдэн хэсэгт мэдрэгч суурилуулсан бөгөөд, машинд зорчигч сууж яваа эсэхийг тогтмол шалгаж байх ёстой гэнэ. Уг шалгалтыг хийсний дараагаар аюулгүй тохиолдолд хэт ягаан туяаны төхөөрөмжийг асааж, ариутгалын үйл ажиллагаа хийж эхлэх ажээ. Мөн түүнчлэн машин дотор байрлах камераар ч давхар хянаж байх гэнэ.
Эх сурвалж: Forbes
