Токио-2020 зуны 32 дахь удаагийн Олимпийн наадамд эхлэхэд 31 хоногийн хугацаа үлдээд байна. Тэгвэл та бүхэндээ 2020-ийн эргэн тойрондох мэдээллийг хүргэж байна.
ТОКИО-2020 ЗУНЫ ОЛИМПИЙН НААДМЫН ТАМИРЧДЫН ТОСГОНЫГ ТАНИЛЦУУЛЛАА
Хоёр тэрбум орчим америк долларын өртгөөр, 110 орчим акр газарт боссон 21 барилга байгууламж, 5650 өрөөнд “Токио-2020” Олимпийн үеэр 11000 орчим тамирчид, дасгалжуулагч болон албаны хүмүүс амьдарна. Токиогийн Чюо дүүрэг байгуулагдсан Олимпийн тосгон нь долдугаар сарын 13-нд албан ёсоор нээлтээ хийх хуваарьтай байна. Олимпийн тосгонд уламжлал ёсоор мөн эмнэлэг, банк, дэлгүүр, хими цэвэрлэгээ, үсчин, кафе, хэвлэл мэдээллийн төв, фитнесс заал зэрэг оршин суугчдын тав, тухыг хангах бүх л үйлчилгээгээр үйлчилнэ.
ТОКИОГИЙН ОЛИМПИЙН ДУГУЙН ТРЕЙК ТӨРӨЛ
Токиогийн олимпийн наадамд дугуйн трейк уралдаан зургаан төрлөөр явагдана. Ганцаарчилсан спринт, багийн спринт, багийн хөөх, кейрин, omnium болон madison гэсэн төрлүүд явагдана. Тамирчид энэ төрөлд нийт 12 алтан медалийн төлөө өрсөлдөнө. Францын баг тамирчид энэ тэмцээнд хамгийн олон буюу 34 алт, 22 мөнгө, 22 хүрэл медаль, нийт 78 медаль хүртжээ. Дугуйн трейк нь 1896 онд эрэгтэйчүүдийн төрөл, 1984 онд эмэгтэйчүүдийн төрөл зуны олимпийн наадмын хөтөлбөрт багтжээ
ОЛИМПИЙН БАМБАР ХААНА ЯВНА ВЭ?
Олимпийн наадмын бамбар дүрэлзэн ассан гал эв найрамдал, эрх чөлөө, энх тайвны билэг тэмдэг. Тэгвэл Токиогийн олимпийн наадмын галт бамбар Японы Мияаги аймагт аялж байна. Олимпийн наадмын бамбар ийнхүү 40 дэх хотоороо аялж буй нь энэ билээ. Галт бамбар 22-ны өдөр Мияаги аймагт саатаад 23-ны өдөр Шизүоко аймгаар аялна.
АНУ-ЫН ТРЕК ОД ЭЛЛИСОН ФЕЛИКС ЗУНЫ ОЛИМПОД ТАВ ДАХЬ УДААГАА ОРОЛЦОХ ГЭЖ БАЙНА
Өдгөө 35 настай Эллисон Феликсийн хувьд өнгөрсөн ням гарагт Токио руу зорих эрхээ авчээ. АНУ-ын туршилтын тэмцээнд 400 метрийн зайд 50.02 секундын дотор 2-р байр эзэлсэн нь зуны олимпод тав дахь удаагаа хүч сорих боломжийг олгожээ. Тэрээр өөрийн шагналын сандаа аль хэдийнээ олимпийн наадмын 9 медалийг цуглуулаад байгаа билээ. Тэрээр тэмцээний дараа хэлэхдээ "Энд ирэхийн тулд маш их хүчтэй тулаан болсон. Би яаж хийхээ хамгийн мэддэг нэг зүйл бол тэмцэл. Тав дахь удаа маш онцгой байх болно.” хэмээн хэлжээ.
ТОКИО 2020 ОЛИМПИЙН НААДМЫН АРХИ, БЭЛГЭВЧ БОЛОН ФЕНҮҮД
Токиогийн зуны Олимпийн зохион байгуулах хорооноос тэмцээнд оролцогчидын аюулгүй байдлыг хангах ажлын хүрээнд тамирчны тосгонд согтууруулах ундаа оруулахыг зөвшөөрч, зөвхөн өрөөндөө л хэрэглэнэ гэж мэдэгджээ. Харин зохион байгуулах хорооноос оролцогчдыг тосгонд байх хугацаанд нь бэлгэвч тараахгүй, харин явахад нь тараах болно гэж мэдэгдсэн нь саяхны Олимпийн уламжлалаас гажуудсан хэрэг болжээ.
1988 оны Сөүлийн Олимпоос хойш ДОХ гэж нэрлэгддэг дархлалал хомсдлын вирусын талаархи мэдлэгийг дээшлүүлэх зорилгоор оролцогчдод бэлгэвч өгдөг болсон гэж хорооноос мэдээллээ.
ТОКИОГИЙН ОЛИМПИЙГ ҮЗЭГЧТЭЙ ЯВУУЛНА
Олимп эхлэхэд сар орчмын хугацаа үлдээд байхад Токиогийн олимпийг үзэгчтэй явуулахаар болжээ. Гэхдээ тухайн стадион, байгууламжуудын суудлын 50% нь үзэгчтэй, хамгийн дээд тал нь 10.000 хүнтэй байх ёстойг зарлажээ. Харин хилийн чанадаас үзэгч хүлээн авахгүй гэдгээ өмнө нь хэлсэн билээ.
