Орост нэг санхүүгийн пирамид хэлбэрээр ажилладаг луйврын сүлжээг сэтгүүлчид нь илрүүлээд бөөн юм болж байна л даа.

Залуучууд (гол зохион байгуулагч, пирамидынхаа дээр байдаг хэд нь) гадаад орнуудаар аялж, тансаг буудал амралтын газраар хэсч, 1р зэрэглэлийн брэндүүдийг худалдан авч байгаа,үнэтэй машин, хувийн онгоцон дотор жаргаж байгаа зураг бичлэгүүдээ байнга оруулна. Тэгээд "манай компанид хөрөнгө оруулбал сарын дараа л аялж эхэлнэ, жилийн дараа бид нар шиг амьдарна" гэж бичлэгэн дээрээ байнга хэлнэ.

Хялбар аргаар мөнгөтэй болж, эд нар шиг амьдрах юм байна гэж итгэсэн залуус байраа зарж, өр зээл тавьж, ээж аавынхаа хураасан хэдийг аваачиж өгнө.Мөнгөө бариад ирсэн хэдийг гоё охидууд, найс гайсаар дүүрсэн клубт хүлээн авч үдэшлэг энэ тэр зохионо. Нөгөө хэд гоё хүрээлэлд орсон, удахгүй баяжина гэж хүлээнэ.

Бараг мянгаад залуучууд, доод тал нь 5 сая дээд тал нь 100 сая аваачаад өгчихсөн.

За ингээд баахан ээж аавын нус нулимс, айл гэрийн хоосорсон амьдрал... Инстаграммын гоё зураг бичлэгүүд худлаа болж таарлаа. Доторхийг нь хувийн онгоц шиг зассан студи, түрээсийн машинууд, зурганд зориулж тавьж өгдөг хулхи брэндүүдийг ашиглан пост оруулдаг болж таарлаа. Ингэж хүн хуурдаг үйл ажиллагаанд ордог залуусыг интернэтээс "өндөр цалинтай ажилд урьж" олж авдаг. Бүх ашиг пирамидын толгойд нь байх ганц залууд очно. Тэр бол жинхэнээсээ ганцаараа баяжиж байгаа нөхөр, жинхэнээсээ аялдаг. Аан тийм, нөгөөх тансаг амьдрал постолдог нөхдүүд төлбөртэй онлайн сургалт хийдэг. Энэ сургалтаар хувь пиараа л өсгөна, өөрийгөө бишрүүлнэ, мөнгөө энүүнд л өгч өсгүүлье гэх бодол төртөл хуурна. Нээх юм заахгүй дээ.

Хэд хэдэн залуус, охид ээж ааваа хоосруулчихаад "Баяжлаа, bye" гээд хаалга саван гарч одсон ч удалгүй Москвагийн гудамжнаас орох оронгүй, очих газаргүй "олдож" байна. Мөнгийг нь дансаар авчихсан компаниуд танилцуулган дээрээ бичсэн хаяг дээрээ байдаггүй (яаж байхав дээ), өмнө очиж уулзаж байсан оффис нь хаагдчихсан байх жишээний.

Хамгийн гайхалтай нь, танай компани яг юу хийж мөнгөө өсгөдөг юм бэ гэхээр хүнд нь тааруулж хариулдаг байсан байгаа юм. Энэ бол нууц эсвэл хөрөнгө оруулалт, эсвэл коин....Гэхдээ ингэж асуудаг хэрсүү залуус биш бусдын тансаг амьдралын постонд итгэдэг хоосон толгойтой нөхөд л мөнгөө өгнө, ойлгомжтой. Тийм хүмүүс яасан ч их юм

За нөхөд өө! Манайд бас зүгээр л фэйсбүүк, инстаграммаар нь хараад шүтдэг, цаанаа юу хийдэг ямар бизнестэй, ямар төлөвшил хүмүүжилтэйг огтын судалж мэдэхгүй хамаг мөнгөө аваачаад өгөхөд бэлэн хүмүүс их бий шүү!

Хялбар мөнгө гэж хаана ч байхгүй! Үхэх төрөх хоёр үнэн гэдэг шиг үнэн бол энэ.