Уншилгүй алгасах пост
Бүх юм хэрвээ хүссэнээр болдог байсан бол байна ш дээ, миний хамгийн балай хүсэл юу гээч ккк, жилийн бүх өдрүүдэд 24 градус байдаг газар очиж амьдрах. Тэгээд яг тийм газар байдаг эсэхийг судлаад, байвал бас очоод амьдарчих санаатай (ооё яг очлоо очлоо бүр) эрээд сураад явтал байна цаана чинь. Кени! Тэгээд бодлоо, за одоохондоо энэ байгаль цаг агаарт дасан зохицож байгаад (аягүй харж үзээд байгаа юм биш үү) яг боломжтой болохоороо үгүй нээрээ хэсэг ч болтугай амьдарч үзэж, хүслээ биелүүлэх юм шүү гэж. Тэгээд магадгүй яг тийм орчинд очихоороо цас, бороо, салхи, шуурга, халуун хүйтэн агаараа санаад уйдаад эхлэх юм болов уу...
Тэрэн шиг хүн өөрт байхгүй зүйлээ хүсэж мөрөөдөж, өөртөө бий болгочхонгуутаа дараагийн зүйлд сонирхол нь шилжиж, эсвэл хуучин байсан нөхцөл руугаа тэмүүлдэг юм болов уу?
За тэр яах вэ, сүүлийн үед нээх сонин бодол орж ирээд байдаг болчхож. Энэ гэхдээ их хувийн шинж чанартай л даа. Гарчиг дээрээ хүртэл уншилгүй алгасах пост шүү гээд байхад хэрвээ энэ хүртэл уншчихсан яваа бол хэлье хэлье кк. Зөв буруу эсэхийг нь үнэхээр мэдэх юм алга. Гэхдээ би ахиж хүнтэй суувал хүүхэд бараг гаргахгүй юм шиг байна. Суувал хүүхэд гаргаж өгөх шаардлагагүй хүнтэй сууна. Суухгүй байсан ч нээх ялгаа алга гэж бодох болсон. Ер нь хүн бүр олон хүүхэдтэй болох албатай биш биз дээ тэ. Амиа сонсогдож байгаа байх л даа. Гэхдээ би одоо байгаа ганцыгаа л сайн хүн болговол бурхан минь болоо гэж өнөөдрийн өнцгөөс хараад л сууж байна. Магад 5 жилийн дараа өөр юм ярьчихсан явж байхыг үгүйсгэхгүй. Мэдэхгүй ээ, би нээх тийм олон хүүхдэд сайн ээж байж чадахаар хэмжээний сэтгэл зүйн бэлтгэлтэй хүн биш юм шиг санагдах болсон. Эсвэл үүрэг хариуцлага нэмж үүрэхээс зугтдаг амиа нөхөр юм шиг байгаа юм. Тоондоо биш, чанартаа гэсэн уриа лоозон барьчхаад л сууж байгаа.
Хувийн амьдралаа хамаагүй дэлгээд гэж өмнөх постон дээр хүмүүс намайг загнасан байсан мэр сэр... Гэхдээ ийм асуудлын талаар бид огт чөлөөтэй санал бодол солилцож чаддаггүй. Бүгд дотроо өөр өөр бодолтой мөртлөө ил гаргаж чаддаггүй нь үнэн ш дээ. За энэ хүртэл уншчихсан бол бас нэг шинэ мэдээ байна кк.
Өсвөр насны охидод зориулсан бэлгийн боловсролын талаар подкаст энд нийгмийн ажилтны чиглэлээр суралцдаг найзтайгаа хамт хийж эхлэхээр болсон. Бид хоёр бэлгийн боловсролын талаар санал солилцож суухдаа их өөр өөр өнцгөөс харж байгаагаа анзаараад ер нь бусад хүмүүс ямар бодолтой явдаг тухай ярилцаад, тэр нь өсвөр үеийнхэнд тэнцвэртэй мэдээлэл болж очоосой гэсэн зорилгоор эхлүүлж байгаа юм. Гэхдээ манай нийгэм хүлээж авах хэр бэлтгэлтэй байгаа бол гэдэг дээр бас л эргэлзээ байсаар л байна. Яг тэр талаар ерөнхий боловсролын сургуулийн эрүүл мэндийн хичээл дээр хэдэн зураг үзээд л өнгөрөөхөөс өөрөөр бид охиддоо мэдлэг өгч чаддаг билүү? Ээж аавтайгаа илэн далангүй ярилцдаг өсвөр үе нийт хувийн цөөхөн хэдийг л эзэлж байгаа зэргээс үндэслэн зориг шулуудаад эхлэх гэж байгаа юм. Та нар маань санал бодлоо бичээрэй. Бүх өнцгийг бид хүлээн авч, тусгахыг хичээх болно оо.
Өө нээрээ, өнөө охин бид хоёрын зургийг ашиглаж хүн залилж байсан нөхрийн хаягийг хаалгасан. Өөр хэчнээн хаяг тэр хүнд байгааг мэдэхгүй ч нэгийг нь бол хаалгалаа. Одоо баримтжуулж авсан мэдээллүүдээ кибер гэмт хэрэгтэй тэмцэх хэлтэст уламжилсныг хэрхэн шийдэхийг харах үлдсэн.
27.08.2019
Эбэрсбэрг