Эхлээд иргэдээ бодьё, дараа нь өөрсдийгөө дөвийлгөе!
Улаанбаатар хотынхныг түгжрэл дунд нь улам гацаасан, удаан хүлээлгэсэн бүтээн байгуулалт болох 40 сая долларын үнэтэй замын цагдаагийн урд талын гүүр өнөөдөр нээлтээ хийнэ гэж аль өнгөрсөн 7 хоногоос л шуум нь тарсан. Гэтэл нөгөө нээлтээ хийх гүүр Даваа гарагийн ид ачааллын үеэр хаалттай л байлаа.
Хэдийгээр бүтээн байгуулалт хийгдэж байгаа нь сайн хэдий ч манай дарга нар "тууз хайчилж, ууж идэх"-ийн дон тусжээ. Тэр ч бүү хэл, нөгөө гүүрэн дээр чинь асар засаж, хэдэн дарга нарын үг хэлэх индэрийг бэлдэж, сандал тавьчихсан байв. Түүнийг дагаад тэдний ажлыг сурталчлах зорилготой хэвлэлийн төлөөлөгч нар нь цуглаастай. Гэвч доор автозам нь түгжирч байхад дээр нь дарга нар "Агуу зүйл хийсэн" гэдгээ зарлаж суух нь юутай гаслантай.
Тэд ямар сэтгэхүйн хэм хэмжүүрээр аливаад хандаад байгаа нь ер тодорхойгүй. Угтаа бол бидний үлгэр жишээ авч, хөгжлийг нь гайхан шагшдаг Япончууд хэзээ ч гүүр барьчихаад тууз хайчлаад зогсдоггүй. Тэд хамгийн түрүүнд ард иргэдээ бодож хийсэн бүтээснээ хурдан ажиллагаанд оруулахыг эрмэлздэг. Гэтэл нөгөө юм үзэж, нүд тайлаагүй гэдэг шиг манайхан юуны ч туханд хүрэлгүй өөрсдийгөө дөвийлгөж, сайн сайхан харагдахаа урьтаж бодох юм.
Чухам төрийн ордон болон хэвлэл мэдээллийн хэрэгслээр бүх нийтийн эрх ашгийг нэгт тавина гэж ярьдаг Ерөнхий сайд маань хүртэл инээчихсэн л явж байх нь тэр. Төрийн түшээдийн минь үг нь үйлдэлтэйгээ нийцдэг байвал хичнээн сайхан...
Харамсалтай нь тэдний сүр болгоод байгаа бүтээн байгуулалтын ирээдүйн хэтийн төлөв ямар байх талаар шүүмж гараад эхэлжээ. Тайлбарлавал, 12 жилийн өмнө Улаанбаатарт ирж ажиллаж эхэлсэн "MAD Urban" хэмээх хот төлөвлөлтийн компанитай Кристофер Грубен гэх хүн "Замын цагдаагийн урд барих гүүрээ нураана гэж 100 доллароор мөрийцье" гэж ам бардам хэлээд орхижээ.
Тэрбээр “Улаанбаатар хотын хувьд хот төлөвлөлтийн оновчтой хэд хэдэн шийдэл бий. Гэхдээ сүүлийн жилүүдэд бүх зүйл буруугаар эргэж эхэлсэн юм шиг санагдах болсон. Одоо хийхээр төлөвлөж буй ажлуудын ихэнх нь сайн шийдэл биш. Хамгийн сүүлийн жишээ гэхэд Олимпын гудамжинд бүтээн байгуулалтын ажил нь эхэлсэн, шинэ гүүр байна. Үнэхээр аймшигтай санаа” гэж хэлсэн байна.
Учир нь хотынхоо тэг дунд гүүр барьж байгаа нь өөрөө хот төлөвлөлтийн асар буруу шийдвэр учраас тэр шүү дээ. Дэлхийн томоохон хотууд өнгөрсөн зуунд барьсан гүүрнүүдээ нураахаас өөр сонголтгүй болж эхнээс нь нурааж, системийг нь шинэчилж эхэлсэн байхад манайх хэдэн 100 жилийн хөгжлөөр хоцорч яваагаа баталсаар.
Ерөөсөө л бидэнд бусдын алдаанаас суралцана гэсэн ойлголт ер алга. Дандаа бурууг сонгоно, дандаа өөрсдийгөө дөвийлгөнө. Тэгээд их хотын хувьд зүгээр л нэг зам, гүүр барьчихаад түүнийгээ нээх гэж бөөн сүр бадраана. Ядахдаа дэлхийн хамгийн хурдан галт тэргийг бүтээчихээд "тууз хайчилдаг" болмоор байна.
Н.Чимгээ
Эх сурвалж дурдахгүйгээр зөвшөөрөлгүй хуулбарлан нийтлэхийг хориглоно.