2018 оны байдлаар 12.899 хүүхэд асрамжийн төвд өсөж хүмүүжсэн бол 1.069 хүүхэд гэр бүлийн хүчирхийлэлд өртжээ. 29.100 хүүхэд сургуулиасаа завсардаж, 560 хүүхэд гэмт хэргийн улмаас гэмтэж, 238 хүүхэд бэлгийн хүчирхийллийн золиос болсон. 

2018 онд хүчирхийлэлд өртсөн 1.688 хүүхдээс 88 хүүхэд нас барж, 56 хүүхэд амиа хорлосон.

Энэ тоо бол зөвхөн бүртгэгдсэн тоо. Хаалттай хаалганы өшөө хэд байгааг хэн ч тааж мэдэхгүй. Хайрлагдах гэж л хорвоод мэндэлдэг үрсээ өөрсдийн гараар алдаг нэгэн ч энэ нийгэмд байна. Өрөөлийн гарт алдчихаад энгэр цээжээ эгштэл шаналж яваа хүмүүс ч олон байна. 

Тэгвэл гэр бүлийн орчинд үйлдэгддэг хүчирхийллийг ихэвчлэн хөрш, ах дүү, хамаатан садан, найз нөхөд нь л хуулийн байгууллагад хандаж илчилдэг. Учир нь гэр бүлийн хүчирхийлэлд өртөж буй нийт эмэгтэйчүүд, хүүхдүүдийн олонх нь амьдралын баталгаажих түвшин доогуур, хүчирхийлэгчээс санхүүгийн хараат нь элбэг байдаг аж. Улмаар тэд тэвчих замыг сонгож, цагдаад мэдэгдвэл бүр ч дордож мэднэ хэмээн айж бүхнийг чимээгүй хав дардаг. 

2018 онд хүүхдийн хүчирхийллийн 84% нь гэр бүлийн орчинд үйлдэгджээ. Нийт хүчирхийллийн 30.3%-ийг бие махбодын, 7.5%-ийг бэлгийн, 25%-ийг сэтгэл санааны, 37.2%-ийг үл хайхрах байдлын хүчирхийлэл эзэлж байна. 

Ерөөсөө л хүчирхийлэл бүрийн цаана хүүхэд хохирсоор байна. Насанд хүрэгчдийн арчаагүй, ухамсаргүй үйлдлийн улмаас Монголын хүүхдүүдийн эрх маш олон талаараа ил болон далд хэлбэрээр зөрчигдсөөр байна.

Хүчирхийллийн хор уршиг хэзээ ч арилдаггүй. Хэн ч тэр аймшигтай дурсамж, сэтгэлийн хар толбо, маш их айдсыг арилгаж чаддаггүй...

Харвардын Их сургуулийн эрдэмтдийн хийсэн судалгаагаар хүүхдийн хүчирхийлэл нь бие махбодь, сэтгэл санаанд хохирол учруулаад зогсохгүй хүний ДНК-д ч арилахааргүй сорви үлдээдэг болох нь нотлогдсон. Хүүхэд насандаа хүчирхийлэлд өртөж байсан хүмүүсийн генийн код дотор химийн содон шинж тэмдэг буюу бусдаас ялгаатай байдал байгааг тэд илрүүлжээ. Эрдэмтэд спермийн дээжид ДНК-ийн түвшний шинжилгээ хийж хүчирхийлэлд өртсөн эсэхийг нь таньж болохыг урт хугацааны судалгааныхаа дүнд мэдсэн нь энэ юм. Шинжилгээний дүн нь зөвхөн урт хугацааны физик нөлөөлөл биш эр бэлгийн эсүүдэд үлдээсэн хүчирхийллийн нөлөөллөөс үүдсэн өөрчлөлт буюу "шарх" нь үе удамд дамжиж болзошгүйг ч анхааруулсан байна. Учир нь метилаци буюу ДНХ-ийн хэлхээнд нэмэгдсэн бүтцийг генийн түвшинд нөлөөлдөг үйл явц нь ДНХ-ийн бүтцэд арилшгүй ул мөр үлдээдэг аж.

Харвардын Их сургуулийн судлаач, доктор Андреа Робертс “Хүчирхийлэл дараагийн үедээ сөрөг нөлөө үзүүлдэг зан үйлийг бий болгодог гэдгийг бид мэднэ. Хүчирхийллээс үүдэн сэтгэлээр унаж, улмаар хүндээр өвчлөх зэрэг стрессийн гаралтай эмгэг үүсдэг. Энэ нь эцэг, эх болсон хойно нь ч арилахгүйгээр үлдэж хүүхдээ хүмүүжүүлэхэд нь сөргөөр нөлөөлдөг” хэмээн тайлбарласан байдаг.

Эцэг, эх байж чадахгүй бол хүүхэд битгий төрүүл, хамгаалалт хэрэглэ!

Хүн шиг хүн байж чадахгүй нялх хүүхэд хараад сэрэл чинь хөдлөөд байвал сэтгэцийн эмнэлэгт хэвтэж эмчилгээ хийлгэ!

Өөрөөсөө сул дорой нэгэнд эр бяраа гаргадаг бол мөрөөрөө бусдад гай болохгүй ганцаараа амьдар!

Үр, хүүхдийнхээ дэргэд гэртээ архи ууж, согтуурхахаа зогсоо!

Ааваа, ээжээ гэж дуудуулах үртэй хүн бүхэн түүнийгээ нандигнан хайрла, хүчирхийллийн золиос бүү болго!

Хүүхэд өсгөх зөв арга бол"хүчирхийлэл" биш. Зодуулж өссөн хүүхэд зөрүүлээд бусад руу гар далайдаг нь маргашгүй үнэн юм. 

О.Баяраа

Эх сурвалж дурдахгүйгээр зөвшөөрөлгүй хуулбарлан нийтлэхийг хориглоно.