Коронавирусийн талаар сүүлийн үеийн цогц мэдээлэл #1
"Саак өнцөг" булан коронавирусийн талаарх сүүлийн үеийн цогц мэдээллийн эхний хэсгийг хүргэж байна.
Коронавирус Монголд
Тусгай үүргийн онгоцоор ирсэн 3 иргэнээс Ковид-19 илрэв
Анхны тохиолдол: Москва-Улаанбаатар чиглэлийн онгоцоор гуравдугаар сарын 2-нд УБ-т газардсан Франц иргэнээс илрэв.
Удаах тохиолдол: Сөүл-УБ, Берлин-УБ-ын тусгай үүргийн онгоцоор ирсэн 3 иргэн гуравдугаар сарын 17-ны өдрийн 20 цагт эхний шинжилгээний хариугаар Ковид-19 халдвар авсан нь тогтоогдов.
Коронавирус дэлхийд
Европ тив дэгдэлтийн төв болов
Дэлхий дахинд бүртгэгдсэн халдварын нийт тохиолдол: 175,721 (гуравдугаар сарын 17-ны 00:00 цагийн байдлаар)
Дэгдэлтийн төв /анх/: БНХАУ- нийт 80,880 тохиолдол.
Дэгдэлтийн төв/одоогийн/: Европ тив. Тэр дундаа Итали-нийт 24,747 тохиолдол, Иран 14,991, Испани-9428 тохиолдол тус тус бүртгэгдсэн.
Коронавирусийн дэлхийн хамгийн залуу тээгч
Лондонд дөнгөж төрсөн нярайгаас Ковид-19 илрэв
Гуравдугаар сарын 15. Хойд Миддлесекс их сургуулийн эмнэлэгт төрсөн нярайгаас хэдхэн цагийн дараа шинжилгээ авахад Ковид-19 илрэв. Нярай вирусийг халдвартай эхээсээ авсан байжээ.
Эдгэрэлт
ДЭМБ: Дэлхий нийтэд бүртгэгдэж буй Ковид-19 халдварын 80 хувь нь хөнгөн явцтай байна
Дэлхий дахинд нийт эдгэсэн хүмүүсийн тоо: 77,868 (дээр дурьдсан өдөр, цагаар)
Хятад улсад: 67,819 эдгэсэн тохиолдол бүртгэгдсэн.
Тус улсад коронавирусийн халдвар авсан нийт хүний 84 орчим хувь нь эдгэрсэн талаар Хятадын Эрүүл мэндийн хорооноос мэдэгдсэн.
Итали улсад: 2335 эдгэрэлт бүртгэгдэв.
Иран улсад: 4590 хүн эдгэжээ.
Вакцин
Жил хагасын дотор коронавирусийн вакцин гаргаж, олноор үйлдвэрлэж эхэлбэл дэлхийн дээд амжилт болно
ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа гуравдугаар сарын 10-ны өдөр “Жил хагасын дотор коронавирусийн вакцин гаргаж, массд үйлдвэрлэж эхэлбэл дэлхийн дээд амжилт болно” гэж мэдэгдэв.
”ОУ-ын түншлэлийн сан”-гийн 66 сая ам долларын санхүүжилтээр нийтдээ 30 гаруй өндөр хөгжилтэй улс орны биотехнологийн мэргэжилтнүүд вакцин гаргаж авахаар ажиллаж байгаа гэв. Тэгвэл тэдний зарим нь дөрөвдүгээр сарын эхээр, зарим нь дөрөвдүгээр сарын сүүлчээр вакцинийг 3 үе шаттайгаар амьтан дээр туршихаар төлөвлөж байгаа аж. Гэвч амьтны, клиникийн гээд тус тус 3 үе шат дамжлагатай туршилт хийж, амжилттай гаргаж аваад, массд зориулж үйлдвэрлэтэл багадаа 12-18 сар буюу жил хагасын хугацаа шаардана гэсэн юм.
БНХАУ-ын мэргэжилтнүүд нэгдүгээр сарын 9-ны өдөр: Коронавирусийн генийн дарааллыг олж тогтоосноо мэдэгдэв.
Үүний дараа тэргүүлэгч компаниуд уг генийн дараалал дээр суурилж лабраторид вирусийг гаргаж авах, улмаар боломжит вакциний хувилбаруудыг хөгжүүлэх ажилдаа оров.
БНСУ-ын Чүннамын Үндэсний Их Сургуулийн багш, профессор Сео Санг-Хигээр ахлуулсан судалгааны баг гуравдугаар сарын 11-ний өдөр: Эс ургуулах технологи ашиглан Ковид-19 вакцины антигенийг анх удаа амжилттай гаргаж авснаа зарлав.
АНУ-д Сиэтл хот дахь “Kaiser Permanente Washington” эрүүл мэндийн судалгааны институт гуравдугаар сарын 16-ны өдөр коронавирусийн эсрэг вакцины клиникийн туршилтын анхны тарилга хийж эхлэв.
АНУ-ын Үндэсний эрүүл мэндийн институтээс санхүүжүүлсэн коронавирусийн эсрэг вакцины эхний туршилтад сайн дурын 45 залуу оролцож, “Moderna Inc” компанитай хамтран гаргасан вакцины өөр өөр тунг тариулахаар болжээ. Вакцины туршилтын тунд коронавирус ороогүй тул сайн дурын оролцогчид халдвар авахгүй гэж мэдэгджээ. Энэхүү туршилт нь вакцины сөрөг, гаж нөлөөг илрүүлэх зорилготой аж.
Коронавирусийн вакцин бүтээхээр ажиллаж байгаа Германы эрдэмтдийг АНУ урвуулах гэж оролдов
Шинэ төрлийн коронавирусийн вакцин гаргахаар ажиллаж байгаа Германы CureVac компанид Дональд Трампын ЗГ-аас их хэмжээний мөнгө амлаж, бүтээлийг нь зөвхөн АНУ-д ашиглахаар онцгой давуу эрхтэй эзэмшихийг оролдсон талаар Германы WELT am Sonntag” сонин мэдээлэв.
CureVac компанийн удирдлагын мэдээлснээр тус компанийн вакцины туршилтын хувилбар ирэх зургаа, долдугаар саруудын нэгэнд бэлэн болж, хүн дээр турших эрхээ авах төлөвлөгөөтэй байгаа гэнэ.
Харин зарим эрдэмтэд хүний дархлааг хоёроос гурван сарын хугацаанд дэмжих түр хугацааны вакцин гаргаж авахаар ажиллаж байна.
