Та хүүхдэдээ "Дуугүй бай, чимээгүй бай, битгий саад болоод бай" гэж хэлдэг бол насны эцэст уйлж суухдаа бэлдэх хэрэгтэй
Амьдрал заавартайгаа ирдэггүйн адилаар хүн бүр хэрхэн сайн аав, ээж байх ёстойгоо мэдэхгүй төөрөлдөх нь бий. Бид бүгд л үр хүүхдийнхээ төлөө ажиллан хөдөлмөрлөж, бүхий л сайн сайхныг тэдэндээ хүсдэг.
Гэхдээ...
Та хүүхдээ идэх хоол, өмсөж зүүхээр л дутаахгүй байвал болоо гэж боддог эцэг, эхчүүдийн нэг юм биш биз? Хайраар тэтгэгдэж өссөн хүүхэд ирээдүйд эцэг, эхийнхээ ачийг сайн хүн болж хариулдаг бол хайрлуулж өсөөгүй хүүхэд өр өшиглөдөг жамтай. Ялангуяа та гар утсаа үзээд буйдан дээрээ хэвтэж байхдаа, гал тогоондоо хоолоо хийгээд зогсож байхдаа, аль эсвэл ажилдаа анхаараад сууж байхдаа энхрийлэл хүссэн хүүхдэдээ "Дуугүй бай, чимээгүй бай, битгий саад болоод бай" гэж хэлдэг бол насны эцэст уйлаад сууж байхдаа бэлдэх хэрэгтэй болов уу?
Яагаад гэвэл та хүүхдэдээ чухал үед нь хань болоогүй шүү дээ. Амыг нь таглаж, хөдөлгөөнийг нь хорьлоо гээд хүүхэд чинь сайн хүн болж төлөвшихгүй.
Харин ч эсрэгээрээ тэд аав ээжийн өмнө амаа хамхих ёстой гэж бодон өсвөр насандаа бүх зүйлсээ нуух болно. Тэд угтаа бол аав, ээж угаасаа надад туслахгүй, хайрлахгүй, сонсохгүй гэсэн бодлоор тархиа тэтгэж бие хүн болж хүмүүжинэ.
Энэ бүхний эцэст юу тарина түүнийг хураана гэдэг шиг та хийсэн үйлдлийнхээ хариуг харин ч нэг томоор хүлээж авна даа. Энгийнээр хэлбэл нас ахиад, хүүхдийн тань тусламж хэрэг болох цагт тэд таны хэлдэг байсан шиг "Дуугүй бай, чимээгүй бай, битгий саад болоод бай"!!! гэх үгсийг нүд рүү чинь хараад хэлэх болно. Дараа нь өөрсдийн үр хүүхдээ ч тэгж өсгөнө.
Аргагүй шүү дээ. Тэд "Алив ярь, би сонсьё, яаж туслах уу" гэдэг үгсийг сонсож өсөөгүй юм чинь... Үүнд хэнийг ч буруутгах аргагүй. Хүүхэд эцэг, эхийн толь байдаг учраас өөрсдөдөө л гомдохоос яахав. Гэхдээ цаг хугацаа оройтохоос өмнө бүхнийг залруулж болно шүү дээ. Зүгээр л, хүүхдээ сонс, хайр хүссэн үед нь хамт бай. Насаараа таны дэргэд хормойноос чинь зуурахгүйгээс л хойш хэсэгхэн хугацааг өөрийнхөө болон үр хүүхдийнхээ төлөө зарцуулахад л хангалттай. Тэгж чадвал та насны эцэст хүндлэл хүлээсэн, нүүр бардам эцэг, эх байх болно.
Хайр бол хайртай гэж хэлээд баталгаажчихдаг зүйл биш. Хайр бол таны авч өгсөн зүйлсийн үнэ цэнээр хэмжигддэг зүйл биш. Хайр бол тэврэлт, халамж, энхрийлэл, тайтгарал юм.
Тэгэхээр үүнийг уншиж байгаа эцэг, эхчүүд минь хүүхдэдээ зөв цагт нь цаг гаргаж сураарай. Басхүү зөвөөр хайраа илэрхийлж, сайн эцэг, эх үүрэгтэй гэдгээ санаарай.
Э.Анударь
Эх сурвалж дурдахгүйгээр зөвшөөрөлгүй хуулбарлан нийтлэхийг хориглоно.